Valdefling kvenna er forsenda farsældar

Amína (fyrir miðju á myndinni) býr í Kebri Beyah í Sómalífylki í Eþíópíu þar sem Hjálparstarf kirkjunnar vinnur með sárafátækum bændum að bættum hag þeirra. Dæmigerðum degi ver Amína í að sækja vatn, elda mat og gera við hústjald fjölskyldunnar. Á meðan býr maðurinn hennar til viðarkol úr dauðum trjábolum sem hann finnur á víðavangi og hugar að húsdýrum fjölskyldunnar. Hjónin eiga fjögur börn en hafa auk þess tekið að sér suður-súdönsk systkin á unglingsaldri sem leituðu skjóls hjá þeim.

Konur á svæðinu hafa ekki haft völd til að taka ákvarðanir um landnotkun, búfé eða fjármál heimilisins og fá mjög takmarkað tækifæri til að taka þátt í sveitarstjórn. Þetta valdaleysi kvenna í fylkinu hefur haft neikvæð áhrif á heilsu og lífsafkomu kvennanna og fjölskyldna þeirra.

Eitt meginmarkmiða verkefnis Hjálparstarfsins á svæðinu er að stuðla að auknu valdi og áhrifum kvenna, samfélaginu öllu til farsældar. Konunum er boðið að taka þátt í sparnaðar- og lánahópum með það að markmiði að þær geti hafið eigin atvinnurekstur. Amína tekur þátt í slíkum hópi með 15 öðrum konum. Í kjölfar fræðslu og láns kom Amína sér upp verslun með eldhúsáhöld sem hún selur nágrönnum sínum. Ágóðann notar hún til að kaupa nauðþurftir fyrir börnin sín.